(၂၈-၃-၂၀၂၅) ရက်နေ့က ဖြစ်ပွားခဲ့သည့် သဘာဝ ဘေးဒဏ် ငလျင်အန္တရာယ်ကို ပြင်းထန်စွာ ကြုံတွေ့ ခံစားခဲ့ကြရသည့် ဒေသအသီးသီးမှ နစ်နာ ခံစားရသူ မိတ်ဆွေများ နှင့် ငလျင်ဒဏ်သင့် ပြည်သူများအတွက် မြန်မာစီးပွားစီမံ အမှုဆောင်များအသင်း (MBE) အနေဖြင့် များစွာ ဝမ်းနည်း စာနာပါကြောင်း အလေးအနက် ဖော်ပြအပ်ပါသည်။
ဖြစ်ပွားခဲ့/ လျက်ရှိသော သဘာဝဘေး နှင့် နောက်ဆက်တွဲ အကျိုးဆက်များကို ဝမ်းနည်း စာနာသောအားဖြင့် MBE အသင်းက (၅-၄-၂၀၂၅) ရက်နေ့၌ ကျင်းပရန် ကနဦး စီစဉ်ထားသည့် “Building a Legacy: Family Governance for the Future” အခမ်းအနားကို ရွှေ့ဆိုင်းခဲ့ပြီး လက်ရှိကာလတွင် အထက်ပါ ငလျင်ဒဏ်သင့် ပြည်သူများအတွက် ပံ့ပိုးကူညီမှုများကို ဆောင်ရွက်သွားပါမည်။
MBE အသင်း၏ ပံ့ပိုးကူညီမှု ကနဦး အစီအစဉ်တစ်ရပ်အဖြစ် အသင်း၏ စီစဉ်မှုဖြင့် မိတ်ဖက် အဖွဲ့အစည်းတစ်ခု ဖြစ်သည့် A bank က ပံ့ပိုးပေးသည့် ၁၀​ ပေ ပတ်လည် Tent များကို JJ Express ယာဥ်လိုင်း အကူအညီဖြင့် ငလျင်ဒဏ်သင့် မန္တလေးမြို့သို့ ယနေ့ (၂၉-၃-၂၀၂၅) ရက်နေ့ ညနေပိုင်းတွင် စတင် ပို့ဆောင်ပေးလျက် ရှိပါသည်။
ဆက်လက်၍ MBE အသင်းဝင်များ စုစည်းကာ သွေးလှူဒါန်းမှုများ ပြုလုပ်သွားမည် ဖြစ်ပြီး မန္တလေးမြို့၊ မင်္ဂလာ ရန်ကင်း ပြည်သူ့ အငှားအိမ်ရာ နှင့် အနီးဝန်းကျင်ရှိ ငလျင်ဒဏ်ခံ ပြည်သူများသို့ MBE အသင်းက ပံ့ပိုးကူညီမှုများ တစ်တပ်တစ်အား ပါဝင်ဆောင်ရွက်သွားမည် ဖြစ်ပါကြောင်း အသိပေး ဖော်ပြအပ်ပါသည်။